ആടുജീവിതം - വീഡിയോ

പത്താം തരം അടിസ്ഥാനപാഠാവലിയിലെ 'അലയും മലയും കടന്നവര്‍' എന്ന മൂന്നാം യൂണിറ്റില്‍ 'ആടുജീവിതം' പരിചയപ്പെടുത്തുമ്പോള്‍ പ്രയോജനപ്പെടുത്താവുന്ന ചില വീഡിയോകള്‍ യൂട്യൂബില്‍ കണ്ടെത്താനായി. അവ വിദ്യാര്‍ത്ഥികള്‍ക്കും അദ്ധ്യാപകര്‍ക്കുമായി ഇവിടെ ചേര്‍ക്കുന്നു.

ബന്യാമിന്‍ ആടുജീവിതത്തെക്കുറിച്ച്

മലയാളിയുടെ പ്രവാസ ജീവിതത്തെക്കുറിച്ച് മറ്റൊരു വീഡിയോ

ബന്യാമിന്‍ വിദേശമലയാളി സംഗമത്തില്‍

ചരമകോളം (കവിത)

ചരമകോളം

ഇന്ന് നിനക്കറിയാം

നിന്നിലെ ജീവരക്തം

ഞങ്ങള്‍ ഊറ്റി കുടിച്ചുവെന്ന്.

തണലുകള്‍

ഞങ്ങള്‍ വെട്ടിയെടുത്തുവെന്ന് 

നിന്റെ ചിറകുകളെ

അമ്പെയ്തൂ വീഴ്ത്തി

കളിവണ്ടികളില്‍

മണല്‍ നിറച്ചുവെന്ന്.

നീ അപഹരിക്കപ്പെട്ടവള്‍

അപമാനിത ....

നാളെ ചരമകോളത്തില്‍

നിന്റെ പടം കണ്ടു

ഞങ്ങള്‍ അത്ഭുതപ്പെടുകയില്ല .

അതുവരാതിരിക്കാന്‍

പത്ര മേധാവിക്ക് ഇപ്പോള്‍

ഞങ്ങള്‍ കൈകൂലി കൊടുത്തിരിക്കുന്നു ..

മേഘ പി ടി

St.John's HS

Parappur, Thrissur

കരയാന്‍ മറന്ന മിഴികള്‍

കരയാന്‍ മറന്ന മിഴികള്‍

കദനഭാരത്തിലിന്നെന്‍ മനം നിറയുന്നുവോ

കാറ്റിന്‍ ചിലമ്പൊലി കനലെരിയിക്കുന്നുവോ

സ്നേഹത്തിന്‍ ദിവ്യദീപ്തികള്‍ അകതാരിലെങ്ങും

സാദരം മൂളുന്നതെല്ലാം ദുരിതപദ്യങ്ങള്‍

ഗംഗയുടെ നാദവും ഗായത്രീമന്ത്രവും ഗോപാലാ

നിന്‍ ഗാന്ധര്‍വ്വവീഥിയും തേങ്ങുമീ വേളയില്‍

നിഷാദജന്മങ്ങള്‍ തന്‍ കൊടും ക്രൂരതയില്‍

നിറമിഴിയോടെ തേങ്ങുന്നീ പൃഥ്വീമാതാവും

നദിയുടെ ജീവരക്തം പോലും ഊറ്റിയെടുത്തില്ലേ

നാഗരികതയുടെ മടിത്തട്ടിലെ കുട്ടിപ്പാവകള്‍

ജീവവായു നല്കുമീ അരുമയാം മരങ്ങള്‍ തന്‍

ജാതകം തിരുത്തുവാന്‍ നീയാര് കാട്ടാളാ...

അംബികയാം സ്ത്രീജന്മങ്ങള്‍ മേല്‍ വിഷപൂരിതമാം

അമ്പുകളെയ്തുവിട്ടാഹ്ലാദിക്കും അസുരന്മാരേ

മാബലിയുടെ മണ്ണില്‍ സ്വപ്നം വിടരുമീ ഭൂമിയില്‍

മരതകപ്പച്ച മിന്നിമാഞ്ഞുപോയതാം ഓര്‍മ്മകള്‍

കരള്‍പിളരും കാഴ്ചകള്‍, കൃഷ്ണാ

കരയാതിരിക്കുവാനാകുമോ?

നീറിപ്പുകയുന്ന വേദനയില്‍

മറക്കാനോ ബദ്ധപ്പെട്ടീടുന്നു

ഓര്‍ക്കുക നീ വല്ലപ്പോഴും നിന -

ക്കായിപ്പാടുമീ ഗന്ധര്‍വരൂപത്തെ......

ഷൈനി ഷാജി (10.A)

GHSS, SADANANDAPURAM

* * * * *

പേരില്ലാത്ത മുറി

പേരില്ലാത്ത മുറി

ഒരു മുറിക്ക്
ഒരു നമ്പര്‍ നല്ലതാണ്
പെരിനേക്കാള്‍ .

ഒരേ പേരുള്ള മുറികള്‍
അപൂര്‍വമാണെങ്കിലും
ഒരേ നമ്പരുള്ള
അനേകം മുറികളുണ്ടാകാം
അതില്‍
അനേകമാളുകള്‍
ജീവിക്കുന്നുണ്ടാകാം.

അവര്‍
അവരുടെ മുറിയെക്കുറിച്ച്
സംസാരിക്കുമെങ്കിലും
മുറിയുടെ നമ്പറിനെക്കുറിച്ചു
അപൂര്‍വമായിരിക്കാം.

ഒരേ നമ്പരുള്ള മുറിയിലെ
അനേകമാളുകള്‍
ഒരേ സമയം
ഒരേ പ്രവര്‍ത്തി ചെയ്യുന്നുണ്ടാകാം.
ഉണ്ണുകയും
ഉറങ്ങുകയും
ടെലിവിഷന്‍ കാണുകയും
ചീട്ടു കളിക്കുകയും
ഭാര്യയെ സ്നേഹിക്കുകയും
കാമുകിയെ വഞ്ചിക്കുകയും
ഒക്കെ ചെയ്യുന്നുണ്ടാകാം.

എന്നാല്‍
ഒരേ നമ്പരുള്ള
മുറിയില്‍ നിന്ന്
ഒരേ പേരുള്ള കവിത
ആരും എഴുതിയിട്ടുണ്ടാകില്ല
ഞാനും അവളും ഒഴിച്ച് ..........

അഭിലാഷ് എം.,

മലയാളം അദ്ധ്യാപകന്‍,

ഗവ. എച്ച്. എസ്. എസ്. എട്നീര്‍,

കാസറഗോഡ്